Friidrettstrenaren og -leiaren Olav Magne Tveitå i Otra IL er tildelt Evje og Hornnes kommune sin Kulturpris for 2017. Det skjedde under den offisielle opninga av det nye friidrettsanlegget på Hornnes stadion tirsdag kveld.

Olav Magne er friidrettstrenar på høgt internasjonalt nivå, men legg like mykje arbeid i å trene unge rekruttar i Evje og Hornnes. Han kom til bygda i 2006. Då låg friidrettsgruppa i Otra IL nesten brakk. Nå nærmar gruppa seg eit par hundre medlemmar. 15 medaljar i Ungdoms-NM (over 15 år) har utøvarar i Otra IL kapra under Olav Magne si leiing. Olav Magne har også vore den store pådrivaren for at Evje og Hornnes kommune nå har det kanskje beste rekrutteringsanlegget for friidrett i landet på Hornnes stadion.

Vi gratulerer med den gjeve og svært fortente heideren!