Mange av rullatorane har slite svært med å halde kroppen i gong no under den seinaste heitebølga. Nemnde Jensen og Hegghaug, som ikkje er meir prega av alderen enn at dei hugsar tilbake til den fyrste Drillo-tida, meinte Drillo sin idé med å trene i svarte søppelsekkar for å tilvenne seg varmen kunne gjere dei meir konkurransedyktige. Dei kom i hug den gamle historia frå VM i Amerika då dei såg England trene med tre lag klær før VM-kampen mot Italia førre dagen. Dette synte seg - akkurat som i 1994 - å vere ein heller dårleg idé. Før fem minutt var gått av treninga, hadde Jensen dumma seg kraftig ut i den svarte sekken sin. Det er mogeleg at heiten inne i den svarte sekken fekk hjernevinningane til skuleinspektøren til å gå endå seinare enn vanleg. For på heilt uforklarleg vis gav han - heilt upressa - vekk ballen til Tommy Birkeland så sistnemde berre kunne hamre kula i nettaket (biletet under). Og Hegghaugen var ikkje stort betre. Han hang med geipen omtrent som ein pelikan inne i plastikken. Etter berre 15 minutt såg dei seg begge nøydde til å kaste av seg sekkane for å kunne fungere rimeleg normalt resten av treningsøkta.

Trening i svarte søppelsekkar gav ikkje VM-gull i 1994, og blei ingen suksess på rullatortreninga i 2014 heller.